گۆڕده‌خمه‌كانی گوندی پرێسه له ناوچه‌ی بارزان
DOI ناسێنەری سەرچاوە دیجیتاڵییەکان:
https://doi.org/10.31918/twejer.2582.18کلیلە وشەکان:
بیناسازی به‌ردین, گۆڕده‌خمه, به‌خاكسپاردن, گوندی پرێسهپوختە
گۆڕده‌خمه جۆره گۆڕێكه لە ناو بەردەڵان، چیا یان گردەکاندا بە مەبەستی بەخاکسپاردنی مردووان دروست کراوە. ئامانجی ئەم توێژینه‌وه‌یه ناسینی بیناسازیی گۆڕده‌خمه‌کان و چۆنیەتی دروستکردنیانە. هەروەک لە ناونیشانی توێژینەوەکە ڕوونە، تیشک دەخرێتە سەر گۆڕدەخمەکانی گوندی پرێسه لە قه‌زای مێرگەسۆر، ئیدارەی سۆران. ڕێبازی توێژینەوەكه مه‌یدانیی شیكارییه، بە پلەی یەکەم پشت بە کاری ڕاستەوخۆ لەسەر خودی گۆڕدەخمەکانی گوندی پرێسه (گۆڕی ژماره 3) ده‌به‌ستێت، چونکە ئەم گۆڕدەخمانە هیچ جۆرە توێژینەوەیه‌کی زانستییان لەسەر ئەنجام نەدراوە و ئەم توێژینەوەیە، له‌بواری تایبه‌ت به گۆڕده‌خمه‌كاندا بە یەکەم کاری زانستی له‌مباره‌یه‌وه دادەندرێت، هه‌ربۆیه زۆربەی کارەکانی ئەم توێژینەوەیە پشتی بە هه‌وڵی کەسیی خۆم به‌ستووه کە ڕاستەوخۆ له هه‌موو ڕوویه‌كه‌وه کارم لە سەرکردووە. لە پاڵ کاری ڕاستەوخۆشدا لەسەر گۆڕدەخمەکە و لە هەمان کاتدا پشت بەو ژێدەرانە به‌ستراوه كه باسی مێژووی گۆڕدەخمەکان دەکەن و به ئه‌گه‌ری زۆر بۆ هەمان سەردەمی گۆڕدەخمەکەی گوندی پرێسه یان سەردەمەکانی تر ده‌گه‌ڕێته‌وه.
ئەنجامەکانی ئەم توێژینەوەیە نیشانده‌ری ئەڵقە ونبووەکانی بەخاکسپاردنن لە ئەشکەوتەوە بۆ گۆڕده‌خمه لەم ناوچەیەدایە. وەک بەرئەنجامێکی گشتی، گۆڕده‌خمه‌کان وەک بیناسازی بەردین، خاوەنی جۆرێک لە پیرۆزی و بەهای بەرزی ئایینی بوون. ڕۆڵی کولتور و باوەڕەکان لە چۆنیەتی بینای گۆڕده‌خمه‌کاندا لە خاڵە گرنگەکانی ئەم جۆرە بەخاکسپاردنەیە.
