تایبەتمەندییە مینیمالیستییەكان لە كورتیلە چیڕۆكەكانی تێكۆشەر خالید دا

پوختە

ناونیشانی ئەم باسە بریتییە لە (تایبەتمەندییە مینیمالیستییەكان لە كورتیلەچیڕۆكەكانی تێكۆشەر خالیددا)، کە باسێکى وەسفى شیکارییە و لە پێشەکى و دوو بەشى سەرەکى پێکهاتووە، بەشى یەکەم تایبەتە بە لایەنى تیۆرى و تێیدا چەند بابەتێکى وەک (چەمک و زاراوە و مێژووى مینیمالیزم، تایبەتمەندى و قەوارەى کورتیلە چیڕۆک، بەژانر بوون یا نەبوونى چیڕۆکى مینیمالیستى) بە پشت بەستن بە کۆمەڵێک سەرچاوە و ژێدەرى هاوچەرخ بە زمانەکانى کوردى و عەرەبى و فارسى و ئینگلیزى باس کراون، و بەشى دووەم دیوێکى پڕاکتیکى لەخۆی گرتووە و تایبەتمەندییەکانى کورتیلەچیڕۆک لەسەر دەقەکانى تێکۆشەر خالید پڕاکتیزە کراون و لە کۆتاییشدا ئەنجامى باسەکە لە چەند خاڵێکدا خراوەنەتەڕوو.