گوتاری شوناسی نەتەوەیی لە کتێبی (مێژووی شارستانیەتەکان و مێژووی نوێ و هاوچەرخی پۆلی (10 و 12)ی ئامادەیی)

پوختە

ئەم توێژینەوەیە هەوڵیداوە بە پشتبەستن بە میتۆدی شیکردنەوەی ڕەخنەیی گوتاری نۆرمەن فركلاف، پەرتووكی (مێژووی شارستانییەتەكان(2015) و مێژووی نوێ و هاوچەرخ(2015))ی پۆلەكانی (10و12) ئامادەیی وێژەیی قوتابخانەكانی هەرێمی كوردستان شیبكاتەوە و كتێبی پۆلی (11) تایبەتە بە مێژووی ئەوروپا. توێژینەوەكە بەدوای ئەوەدا دەگەڕێت بزانێت، كە تا چەند گوتاری ناسنامەی نەتەوەیی لەم دوو كتێبەدا ڕەنگیانداوەتەوە و ئایا ئەم دەقانە دەتوانن ناسنامەی نەتەوەیی وەك ئامرازێكی بەرەنگاربوونەوەی ئیمپریالیزمی زمانی بەرهەمبهێننەوە و زمان و كلتووری كوردی لە بەرانبەریدا بپارێزن. لە هەر دوو دەقدا هێماكانی ناسنامەی نەتەوەیی كە خۆی لە ئاڵا، نەخشە، ڕۆژژمێر و سروودی نەتەوەیی كوردستان، هەروەها سیمبولەكانی وەك پێشمەرگە، مۆنۆمێنت، شوێنەوارە كۆنەكان، ئەفسانە و ئەدەبیاتی كۆنی كوردی، دەستكەوتە كلتورییەكان و سەركردە نەتەوەییەكاندا خۆی دەبینێتەوە، لە ئاستێكی زۆر لاوازدا خۆی نمایش دەكات. لە بەرانبەردا ناسنامەیەكی نەتەوەیی پارچەپارچە، كاریگەر بە ئاین، ژێردەستە و قوربانی بەرهەمدەهێننەوە.