لوڕەکان لای شەرەفخانی بدلیسی
DOI ناسێنەری سەرچاوە دیجیتاڵییەکان:
https://doi.org/10.31918/01g6fy91پوختە
لێکۆڵینەوە و لێپێچینەوە لە دیاڵێکتەکانی زمانێکی دیاریکراو خۆی لە خۆیدا کارێکی دوور لە سیاسەتە، بەڵام بۆ نەتەوەیەکی وەک نەتەوەی کورد، بمانەوێت و نەمانەوێت، ئۆتۆماتیکی ئەبێت بە مەسەلەیەکی سیاسی، چونکە نەتەوەی کورد یەکێکە لەو نەتەوانەی کە لە ڕووی سنوری سیاسیەوە یەکلانەبۆتەوە، هەر بۆیە پێویستە بە مەبەستی ئاسانکردنی کاری ساخکردنەوەی سنوری وڵاتی داهاتومان، هەوڵێکی زۆر بدەین لە بواری لێکۆڵینەوەی زانستی لە زمانی کوردی و دیاڵێکتەکانیدا.
دیارینەکردنی دیاڵێکتەکانی زمانی کوردی لە سەر بنەمایەکی زانستی پێش دروستکردنی دەوڵەتی کوردی، ئەبێتە هۆی دروستبوونی بناغەیەک بۆ ناکۆکی لە نێوان قسەکەرانی دیاڵێکتە جیاجیاکانی زمانی کوردیدا، کە ئەگەری لێکەوتنەوەی شەڕی ناوخۆی هەیە.
دیاڵێکتی لوڕی لە لایەن هەندێک مێژوونووس و زمانەوانەوە، بە یەکێک لە دیاڵێکتەکانی زمانی فارسی دانراوە، بەهۆی بوونی ژمارەیەک لە وشەی هاوبەش، هەروەها لێکچوونی هەندێک یاسای داڕشتنی ڕستەوە، کە ئەم دوو دیاردەیە زۆر باون و تەنانەت بەربڵاویشن لە نێوان زۆر لە زمانەکانی جیهاندا، خۆ ئەگەر هەر زمانی فارسی خۆی بە نمونە وەرگرین، ئەوا سەدان وشە و زاراوەی عەرەبی و فەرەنسی و ئینگلیزی و تورکی و ئازەری و .... هتد تێدایە، تێبینی دەکرێت.
لە لایەکی ترەوە بە زمانێکی سەربەخۆ لە قەڵەمدراوە، گوایە چۆن زمانی کوردی و زمانی فارسی ئامۆزان (سەر بە یەک خێزانە زمانن) هیندۆ ئەوروپین، ئەوا لوڕیش ئامۆزای سێیەمە و سەر بە هەمان خێزانە زمانە.
